Регенеративниот периферен нервен интерфејс (РПНИ) е релативно нова хируршка метода, која се користи за превенција во појавата на невриноми, како и на фантомска болка по ампутација на екстремитет. Целта на оваа студија е да ја процени ефикасноста на превентивната РПНИ-процедура кај пациентите со апмутиран екстремитет, споредено со пациентите на кои не им е направена оваа хируршка техника. Вклучивме 28 пациенти кои имале натколенична или потколенична ампутација поради тешка мекоткивна инфекција во периодиот од јули 2019 година до декември 2020 година. Сите пациенти имаат инсулин зависен дијабетес мелитус. Пациентите се поделени во две групи од по 14 пациенти со примарен РПНИ и 14 пациенти без РПНИ. Се анализираа демографските статис- тики, нивото на ампутација, бројот на РПНИ, оперативното време, постоперативните компликации и функционалноста во одреден контролен период. Средната воздраст на пациентите е 68,6 години (ранг 49-85), од кои 19 (67,9 %) се мажи и 9 (32,1 %) жени. Во оваа студија беа направени 11 (39,3 %) натколенични ампутации и 17 (60,7 %) потколенични ампутации. Беа направени 37 РПНИ. Просечниот период на следење беше 49 недели. ПРОМИС Т-вредноста е намалена за 15,9 поени во корист на пациентите со РПНИ. ВАС-скорот покажа дека во групата со РПНИ сите 14 пациенти се без болка, во споредба со групата пациенти без РПНИ, каде што 11 пациенти (78,6 %) ја опишале болката како неиздржлива. Групата со РПНИ покажа значајна разлика при употребата на протеза (p < 0,005). Податоците покажаа значително намалување на болката и задоволство на пациентите по ампутацијата со РПНИ. Оваа техника има цел да го спречи формирањето невром. Техниката на РПНИ не предизвика компликации или значително продолжување на оперативното време и треба да се искористи како хируршка техника. [ABSTRACT FROM AUTHOR]