Во трудот е прикажана синтеза на различни деривати на (флуоро)хинолони со инкорпорирање на (бензоиламино)метилна група на слободниот азот од пиперазинскиот фрагмент кај норфлоксацинот, ципрофлоксацинот и пипемидинската киселина како водечки соединенија. Синтетизираните соединенија беа структурно карактеризирани со помош на 1D и 2D NMR, FTIR и масена спектрометрија со висока резолуција. Дополнително беа определени физичкохемиските особини на новосинтетизираните соединенија и корелирани со нивната структура и антимикро- бната активност in vitro. Антимикробната активност на новите соединенија беше испитувана на Gram-позитивни и Gram-негативни бактерии и на C. albicans. Сите новосинтетизирани соеди- ненија покажаа повисок коефициент на распределба и соодветно пониска растворливост во вода во однос на водечките соединенија. Корелациите меѓу липофилноста на синтетизираните соединенија и минималната инхибиторна концентрација (MIC) не беа статистички значајни, што укажува на тоа дека пасивната дифузија не е единствениот механизам со кој тие пенетрираат во бактериските клетки. Потребни се понатамошни истражувања за да се испита како супституциите во (флуоро)хинолонското јадро влијаат врз примарната цел(и), супстратното однесување во однос на бактериските транспортери и севкупната биорасположливост. [ABSTRACT FROM AUTHOR]